[东方报]熱身賽：福仔連格師兄弟重逢 首爾敍舊歎細界[07-31]

巴塞隆拿亞洲之旅第2站轉到南韓，今日傍晚喺首爾世界盃球場對FC首爾，亦係兩位前曼聯師兄弟連格同拉舒福特異地重逢。巴塞首站喺日本贏神戶勝利船3比1，不過大部分時間戰況膠着，直至尾段先連入2球贏波，可見佢哋狀態未足，今場對住近8場主場6次開3球或以下嘅FC首爾，預計入波唔會多，吼實3.5球入球細。（HOY TV 76台周四晚7時直播）

其實巴塞上場日本站賽事幾乎踢唔成，原因據聞係同中介拗數有關，雖然最後行程如期進行，但球隊備戰計劃多少受到影響，所以佢哋上場熱身賽即使贏波，表現亦只屬一般，拉明耶馬同拉芬夏比洛尼等人未見威力，上半場靠角球製造門前混戰開紀錄，但後防一次失誤即被扳平，戰至尾段靠兩次打反擊，由兩位小將攻入2球先至贏波。

地上最強練兵大輪換
上場熱身賽，巴塞主帥費歷克下半場換晒全隊11人，曼聯借將拉舒福特亦喺下半場登場，但踢唔足半場，下半場尾段再次被換走，可見「福仔」狀態似乎未達到要求，預計今場亦會喺下半場先有機會落場，想睇佢同FC首爾隊長連格嘅「曼聯舊生對決」，可能要等一等。

首爾主場保守輸少當贏
FC首爾整體實力自然難與巴塞相提並論，但佢哋勝在正值季中，球員狀態有保證，連格更喺近3場兩度一箭定江山贏波，所以今場面對巴塞大軍壓境唔係冇得打，加上佢哋主場出擊例必保守，對住「地上最強」只求輸少當贏之下，3.5球入球細玩得過。