[东方报]世冠盃：賓菲加老將氣咳 車路士搶W青春風暴[06-28]

賓菲加最後一場分組賽意外地以1比0擊敗拜仁慕尼黑，從而取得小組首名，不難相信情況係人棄我取，拜仁教練高柏尼玩半場讓賽，哈利卡尼、甘美治同米高奧利斯等，下半場先出嚟踢，似乎想走線避開車路士。

近3次對賽藍戰士全勝
「雄鷹」最為人熟悉當然係阿根廷老將迪馬利亞，佢喺3場分組賽都發揮出色，不過「天使」始終37歲，11日踢第4場已經唔易哽，仲要喺美國咁熱嘅天氣之下，體力需求更加高，都咪話唔攞命。唔好唔記得，以防中角色出現嘅奧達文迪，同樣係37歲，亦都係3場都正選，佢哋兩個對住活力十足嘅車路士，上半場都會頂得住，下半場可能就係弱點所在。

講開迪馬利亞同奧達文迪，車路士嘅安素費南迪斯都係佢哋阿根廷同胞，大家都係2022世盃冠軍功臣，安素費南迪斯更加於2023年由賓菲加跳槽到「藍戰士」，今場有知己知彼嘅作用。安素只得24歲，同新加盟嘅利安戴納、馬度基及高爾彭馬等「00後」，有用唔完氣力，即使尼高拉斯積遜停賽，都無損球隊攻力。

事實上，車路士自4月開始持續勇態，近12戰10勝，加上球隊近15次對葡超球隊獲11勝，其中3次對賓菲加全勝，包括2013年歐霸盃決賽贏波捧盃，格食格之下，客勝穩開。