[东方报]世冠盃：保地花高托弗讓客拉唔住[06-28]

今屆世冠盃4支巴甲球隊取得大滿貫，全部晉級，16強立即上演「巴西內訌」，由彭美拉斯惡鬥保地花高。彭美拉斯各項賽事近6場僅得2勝2和2負，表現唔算標青，相反保地花高狀態大勇，各項賽事近6場錄5勝1負，加上近5次對彭美拉斯，取得3勝2和不敗佳績，捧受讓嘅保地花高讓球客勝。■（周日凌晨零時開賽）

彭美拉斯喺A組雖獲首名出線，但3戰僅得1勝2和，只係贏過墊底嘅艾阿里，對波圖同國際邁亞密都係打和，與國際邁亞密同得5分之下，僅以失球少1球而壓過對方首名出線。

彭美拉斯平庸讓唔起
總結世冠盃8組成績，彭美拉斯可以話係成績最弱嘅小組榜首球隊，可能因為佢掛住榜首名銜，所以今場對住B組次名嘅保地花高要讓波，實際上佢哋讓唔起。

至於保地花高喺競爭激烈嘅B組突圍，分組賽曾擊敗歐洲勁旅巴黎聖日耳門，結果喺3隊同得6分情況下，力壓馬德里體育會獲次名晉級，表現充滿說服力，而且單純以近況而論，保地花高近6場5勝亦遠比彭美拉斯好，加上近年對賽保地花高亦未輸過，今場淘汰賽交手保地花高法定時間可保不敗，受讓抵玩。