[东方报]世盃歐洲：養精蓄銳反轉土耳其 西班牙沒法擋[09-07]

今晚世界盃歐洲區外圍賽E組重頭戲，土耳其主場火併西班牙。兩軍都喺首輪打響頭炮，不過情況迥異，土耳其幾經辛苦先保住勝果，相反「狂牛」上仗早早將場波放入雪櫃，以逸待勞兼質勝一籌，今仗有力反客為主，客勝有計。（周一凌晨2時45分開賽）

上年歐國盃殺入8強嘅土耳其，喺「飛機仔」蒙迪拿執教下重攻輕守，日前喺世盃外E組首輪造訪格魯吉亞，去到下半場領先3球下突然鬆懈，被對手末段狂攻連追兩球，幾乎將吞咗落口嘅3分，嘔番兩分出嚟，最後總算成功守住3比2嘅勝果，認真好彩。由於上場鬥到最尾咁激，土耳其未必回得切氣，仲有後備入替嘅前鋒巴列斯耶馬斯領紅要坐波監，攻力受削。

近3次對壘狂牛贏晒
另邊廂，西班牙日前只係用咗頭38分鐘，憑奧耶沙巴爾、古古列拿、米基爾馬連奴各建一功，作客3比0輕取保加利亞，下半場完全係垃圾時間，輕鬆hea到完場，全場高達78%控球率，24次射門12次中龍，同保加利亞4射1中相比，連練波都不如，亦反映「狂牛」冇乜點出力就擸晒3分，抖到夠預備今仗。

雖然西班牙6月失落歐國聯冠軍，但佢哋喺決賽鬥到互射12碼先至輸畀葡萄牙，事實上佢哋連續3個賽事（1次歐國盃及2次歐國聯）都入決賽，獲得2冠1亞，同其他列強相比，表現更加穩定。睇番「狂牛」近8場作客，取得6勝2和未輸過，加上近3次對土耳其贏晒，今仗可乘勝追擊。