[东方报]世冠盃：麥巴比腸胃炎難望披甲 皇馬借細試陣[06-22]

世冠盃H組賽事，西甲勁旅皇家馬德里對墨超嘅帕丘卡，目標爭取沙比阿朗素執教下首勝。論實力皇馬絕對喺帕丘卡之上，不過經過首仗和波失分後，沙比阿朗素都承認球隊需要時間適應新戰術，唔會咁快見真章。皇馬今場只求穩陣贏波，開3.5球入球細機會高。（周一凌晨3時開賽）

皇馬今屆力爭冠軍，可惜第1輪只能夠同沙特嘅希拉爾打和1比1，法國射手基利安麥巴比喺美國因急性腸胃炎入院，雖然已經出院歸隊，但今場多數會繼續缺陣，大大削弱入球能力。

創造力不足難破鐵桶
皇馬喺沙比阿朗素帶領下，進攻戰術仍處於試驗階段，上仗就起用咗小將干沙路加西亞出任箭頭，相信仍會繼續試陣。雖然「銀河艦隊」人腳鼎盛，但要短時間之內踢出沙比阿朗素嘅足球並唔容易，尤其自從卻奧斯離隊之後，中場創造力不足問題仍然未解決，對住主守嘅球隊往往老鼠拉龜。睇番皇馬近4場賽事，總入球全部開3球或以下，今仗目標只求拎3分，領先後隨時收油，難望大勝。

帕丘卡首仗輸畀薩爾斯堡，今場目標係要喺皇馬身上搶分，並期望最後一輪喺希拉爾身上拎3分，今場多數屯重兵死守。帕丘卡上年參加洲際盃，3場總入球都開3球或以下，包括喺決賽吞皇馬3蛋，佢哋吸取教訓後今場會鞏固防守，而且喺前墨西哥領隊羅辛奴執教後，防守更加穩健，今場推介3.5球入球細。