[东方报]熱身賽：紐記未回氣悶鬥馬體會[08-09]

紐卡素熱身賽主場對馬德里體育會，係近年喜鵲球衣贊助商「Sela」為名嘅盃賽，同阿仙奴「酋長盃」相似，今年更於當地時間周五及周六連踢2場，紐記先對愛斯賓奴之後，再鬥馬體會，體力需求是一大問題，預料入波唔會多。（HOY TV 76周六晚11時直播）

紐卡素星期六賽事除咗男足之外，頭場仲有紐卡素女足鬥馬體會女足，加埋周五鬥愛斯賓奴，係球會季前嘉年華。不過紐卡素2日連踢2場，對手馬體會亦係初初備戰階段，今場未必好出力。事實上馬體會對上兩場熱身賽都未上力，1和1負入得1球，加上馬體會面對英超兵近年都以穩陣為主，近6次對英超球隊，5次開2球或以下，今場預計唔會例外。

「酋長盃」阿仙奴要食「包」
至於遲兩個鐘開波嘅「酋長盃」，阿仙奴主場迎戰畢爾包，相信「兵工廠」唔會再好似日前鬥維拉利爾輸波咁失威，今場必定力爭贏波。阿仙奴英超開咧就惡戰連場，頭5輪已要惡鬥曼聯、利物浦及曼城等，球隊要盡快操起作戰狀態，好彩佢哋鬥西甲兵有優勢，近7次交手贏6次，今場可以贏波打番起信心，加上畢爾包周二凌晨兩對利物浦，分別輸1比4及2比3，累積近4次鬥英超兵全敗，今場兇多吉少。（周日凌晨1時開賽）