[东方报]世冠盃：希拉爾爭出線盡炒帕丘卡[06-26]

H組另一場希拉爾為出線，誓擒2戰全敗嘅帕丘卡。希拉爾連續兩場鬥歐洲球隊都保持不敗，相反帕丘卡兩場輸晒，提早被淘汰，高低立見。希拉爾今場最好以2球或以上距離贏波，同組另一場如果分出勝負，就肯定出線，即使隔離嗰場和波則仲有機會計埋得失球，所以鬥心不容懷疑，讓球盤希拉爾讓一球，照捧上盤。（周五早上9時開賽）

希拉爾首戰奪標熱門之一嘅皇家馬德里，落後之下追和1比1，次役鬥薩爾斯堡則互交白卷，現時2分排第3，由於皇馬同薩爾斯堡同得4分，如果佢哋分出勝負，希拉爾贏波就肯定獲得出線資格。

即使皇馬同薩爾斯堡和波，3隊之間對賽一樣係和晒，到時就計對賽得失球，如果咁蹺皇馬同薩爾斯堡踢成1比1，咁皇馬喺3隊之間得球較多首先出線，希拉爾就要同薩爾斯堡鬥總得失球，所以無論如何，希拉爾一定要贏，仲最好大勝。

帕丘卡出局冇戰意
希拉爾由國際米蘭主帥施蒙尼恩沙基接手，急於取得上任後首場勝仗，佢手上有魯賓尼維斯、米連高域沙域及阿歷山大米祖域等具豐富經驗戰將，足以摧毀帕丘卡。事實上帕丘卡同列強實力有一定距離，加上兩戰全敗無心戀戰，累積近4戰輸3場，咁就益晒希拉爾啦。